想做轉按，幾時申請最好？

銀行為按揭客人提供現金回贈，並設有罰息期，一般為兩年。如果係罰息期內提早清還按揭貸款或轉按，銀行會要求客人退回現金回贈，部分銀行甚至乎會向客人收取貸款額的某個百分比作罰息。

由於銀行對轉按客人亦提供現金回贈，促使客人每當罰息期完結之後都會轉按賺銀行回贈，咁到底幾時申請轉按最好？

答案就係：「罰息期完之前3個月！」

客人由齊文件做申請到銀行批出offer，一般需時兩至三星期；連同贖契及銀行放款，一般情況兩個月內都一定完成到。咁點解會話罰息期完之前3個月申請最好呢？

1. 鎖定銀行Offer

各大銀行相繼減低對轉按客人提供嘅現金回贈，甚至上調新造按揭息率。所以即使未完罰息期，客人提早申請亦有助可以享有較佳嘅條款。

2. 鎖定物業估價

物業估價會影響最多可借嘅按揭貸款金額，特別當樓市轉向嘅時候估價跌一跌就可能會影響客人原來嘅財務安排。而估價一般有效期為3個月，所以預早申請可以避免估價波動嘅風險。

3. TU有效期為3個月

當客人申請按揭時，銀行會查詢客人嘅TU（環聯信貸報告）。而由查詢日期開始起計，TU有效期為3個月，若銀行放款時間超過3個月則銀行需要再查詢一次客人嘅TU。由於銀行每次查詢客人TU時亦需付費，所以銀行一般只接受早3個月嘅申請。

建議閱讀：
轉按套現，想啲錢快啲到手可以點做？
轉按想賺盡現金回贈，又唔想扣減貸款額？
想轉按套現套到盡，無奈私人貸款影響「DSR」可以點做？
轉按流程一覽大全
轉按FAQ