律師樓唔On-list可以點做？

買賣物業同申請按揭未必需要經地產代理處理，但就一定要搵律師樓處理。而每間銀行都會有張「律師樓合作清單」，如果律師樓非On-List就不能到該銀行申請按揭。如果真係好想用某銀行上會，又有咩辦法呢？

搵On-List律師樓做駁腳

當你選用嘅律師樓唔On-list，閣下十分鐘情於該銀行，又或者該銀行嘅按揭計劃相當吸引令你非用不可，你可以叫你選用嘅律師樓幫你搵一間On-list律師樓做駁腳處理按揭即可。不過要注意，搵駁腳律師樓會牽涉額外費用，而費用亦相對浮動，所以客人要進行此操作，事前應與律師樓商議額外費用增加多少。

而一般情況律師樓會告知客人於某某銀行並不On-list，並叫客人盡量唔好揀該銀行。而銀行處理按揭申請時都需要客人提供律師樓名稱或卡片，若發現律師樓並不On-list亦會通知客人，並會要求客人轉換律師樓或取消申請。

申請一次性批准

律師樓唔On-list主要有幾個原因，包括以往與該銀行合作時出錯，或者該銀行對於律師樓On-list有特定要求，如須具一定規模或歷史。若律師樓不On-list，部分銀行允許律師樓申請一次性批准，當然是否獲批則要視乎律師樓屬於銀行嘅「觀察名單」抑或係「黑名單」，以及過往合作是否出現重大失誤而定。

延伸閱讀：
首次置業，有咩要準備？
置業預算表