咩情況下車位按揭都可以做到30年？

香港人鍾情磚頭，除咗投資住宅物業外，車位投資亦受大眾歡迎。而按揭上，住宅按揭同車位按揭差異極大，住宅物業最高按揭成數為9成，而車位按揭最高則只能做4成，而車位按揭利息一般較住宅按揭高。一般情況下，車位按揭最長只能做15年，咁有咩情況車位可以做到30年按揭？

住宅及車位屬同一屋苑

要車位按揭可享有較長按揭年期及較低按息，買家可以購買住宅物業時連同車位一併買入，而買入住宅物業及車位需要屬於同一個屋苑範圍。住宅連車位買入並申請按揭，銀行會視為一宗按揭申請，並以住宅按揭準則處理，令車位亦可做到30年按揭。

同一時間買入

車位按揭要做30年，除需要與買入住宅物業屬同一屋苑外，亦需同時間買入並以一份買賣合約完成買賣。假如買家分開買入屬同一屋苑嘅住宅單位及車位，銀行會視為兩宗買賣及需分開申請按揭，呢個情況車位按揭最長只能做15年。

如果買家睇中同一屋苑入面嘅住宅及車位，而該住宅及車位分別屬於兩個不同嘅業主，亦不能做30年按揭。由於不能於同一份買賣合約買入住宅及車位，銀行依然會視為兩宗買賣及需分開申請按揭。

建議閱讀：車位按揭最長可以是30年