上年做完按揭，而家銀行打黎話加息，其實係騙案?

大部分聰明嘅客人都識得每兩年就自動自覺搵得地轉按，每兩年拎返十萬八萬回贈都好丫嘛。但係最近有個客人返轉頭搵我，就唔係做轉按wor, 佢send左個message 俾我

Hi. Daniel. 昨天XX銀行Y先生打電話給我說我TU評級最近貸款很多，要我償還部份貸款,如果不從,他便將現有按揭加至6%，哪有這個道理？

收到呢個message 我都未意識到係騙案，因為銀行真係會檢視你嘅借貸情況，亦有權加息甚至係call loan （即係成個貸款收返），
於是我打返俾當時處理呢個按揭嘅分行行長。分行行長回覆嘅重點如下
一，呢類按揭由分行負責，總行好少會插手。
二，佢地分行冇同事姓Y，自稱銀行職員嘅Y先生留低嘅聯絡電話，並唔由佢地分行。（後來行長再查證，聯絡電話同銀任何分行或者部門都冇關）
三，如果Y先生再打黎，試下約喺分行見面，睇睇對方想點。

縱觀以上資訊，可以肯定Y先生係騙徒，但Y先生點解要咁做呢？筆者同同事討論呢個問題，原來有其他客人都遇過呢類電話，騙徒會假扮銀行職員，話銀行要加息或者收返貸款，再建議客人將按揭轉去相熟嘅財務公司。亂咁借錢，輕則捱貴息，重則連層樓都冇埋。

睇完故仔又有咩告戒大家呢？
其實都係老生常談，遇到可疑來電，千祈唔好輕易相信對方，或者打去對方提供嘅電話號碼核實佢嘅身份。要打就打官方渠道顯示嘅電話，或者搵相熟嘅銀行職員幫手。