俗語有云：「無債一身輕」，傳統智慧都教落叫我哋唔好欠人錢，而呢啲傳統智慧的確有其可取之處。然而社會狀況隨時間改變，老一輩當年買樓做按揭，利息成本雙位數字，當然愈早還清貸款愈好。
不過時移世易，現時按揭利率低至2.375%，甚至乎比通脹仲要低，變相借得愈多；還款年期拉得愈長愈好。
而按揭市場，業主應該有幾多借幾多，賺盡銀行嘅現金回贈方為上策。聰明嘅你應該心中有數，以現時銀行現金回贈約2%，而按揭利息每年2.375%，計落好似借多都無乜著數。
事實上，現時銀行為客戶提供高息戶口（Mortgage-Link），另外按揭貸款亦有提早還款機制，業主借到盡實際上係最著數！
咁即係點呀？就等筆者簡單舉個例：
A先生持有物業價值$1,000萬，尚餘$250萬按揭貸款。
假設現金回贈為2.35%，若A先生選擇平手轉按，佢可以得到$58,750嘅現金回贈。
而如果A先生選擇轉按時借到盡，$1,000萬物業最多可借$500萬，以現金回贈為2.35%計算，可得現金回贈為$117,500。
配合高息戶口（Mortgage-Link）以及提早還款機制，操作如下：
銀行會為高息戶口內嘅資金提供相等於按揭利率嘅利息收入，A先生可以先將借多咗個$250萬放入高息戶口對沖利息支出。
客人最多可以將未償還貸款嘅50%存入高息戶口內作為對沖利息之用，變相多借嘅$250萬實際上係無需利息成本！而高息戶口實際上就等於一個活期存款戶口，有需要時可以隨時調動戶口內嘅資金運用，為客人提供額外流動性。
假設你最後都係覺得借多咗個$250萬真係無用，你亦可以選擇提早清還。而銀行對於提早清還貸款設有一個罰息期，全數還清罰息期多數為2年，而部分還款罰息期則多數為1年。
即是話，一年之後，你就可以將借多咗個$250萬還返晒比銀行而沒有任何代價。變相你轉按時可以用$500萬貸款額賺盡現金回贈，實際只係原有嘅$250萬貸款額先需要比利息。
當然每間銀行對於提早清還貸款嘅罰息條款都略有不同，所以係操作前需先了解清楚銀行條款。
About the Author: 文博
