執平貨注意!! 點解銀行唔批成交價遠低於市價嘅按揭? 如果想執平貨，又要有咩準備?

開場白之前戴個頭盔先，以下所講嘅都係筆者工作經驗所得，唔構成任何建議。大家做決定之前應該搵返律師、按揭顧問、銀行職員等相關專業人士咨詢。

近年移民潮同加息雙重影響下，市場漸漸由買方主導，偶爾會出現一D低過市價(或者講銀行估價)一大截嘅成交。多左人因為批唔到按揭而向筆者求助，所以今日想講下點解銀行唔批呢D按揭同解決方法。

點解銀行唔批低價成交按揭?

好多時鋪頭賣野賣得好平，我地會有個詞語叫「半賣半送」，銀行唔批亦都係同樣道理，賣得咁平，銀行會認為有「送」嘅成份。牽涉到「送」嘅物業，例如送贈契、低價成交、經過家族安排嘅遺產，銀行5年內都唔會做。因為如果賣方/送贈方5年內破產，物業係有機會俾賣方/送贈方嘅債權人追返。銀行借錢俾買方就變得好冇保障，所以銀行一般都唔會批呢類按揭。咁銀行眼中咩叫「低價成交」呢? 每間銀行睇法都有少少唔同，一般低估價嘅10-20%，佢地都可以批到。

執平貨要有咩準備?

喂Daniel，我唔想聽你講耶穌呀，我而家睇中左個樓盤，業主話移民，平市價3成賣出黎，我要點做呀?

所謂「市價」又唔等如銀行估價。除左平時講D計定壓力測試之外，你可以拎住個到址，逐間銀行問「呢個地址估價幾多? 成交價XXX萬，你地做唔做到?」當然，你可以拎俾按揭中介(例如我做緊果間)去問啦。佢地會一次過幫你問晒咁多間銀行。睇下有冇邊間銀行個估價會接近成交價。另外仲有D銀行有預先批核服務，如果真係怕死，可以申請預先批核嘅。(不過如果個盤真係咁荀，等得銀行批俾人買左)