按揭保險點解唔批？

隨著環球經濟增長放緩，中美貿易戰等一連串事件影響，相信未來短期內本港經濟亦難言樂觀。

樓市走勢亦正正反映市民對未來經濟嘅睇法，而近期平均呎價出現回落現象，600萬以下物業嘅成交宗數同時亦增加。

點解筆者會咁強調「600萬」？因為「600萬」正正係一個分水嶺。600萬以下物業配合按揭保險，最高可承造8成按揭，令首期所需資金大大減少！

不過要搞清楚，按揭保險其實唔係「包批」，甚至乎審批比銀行本身嘅批核準則更加嚴謹！而較常見按揭保險唔批嘅原因有……

1. 入息嘅合理性

申請按揭時，銀行會要求申請人提供入息證明，包括糧單、最近一至兩期稅單、出糧戶口記錄等。

按保公司會就著覺得入息不合理嘅申請要求申請人額外提供有關文件或證明，甚至乎會直按拒絕其申請。

舉個例，一個普通文員月薪竟然達到5、6萬；又或者轉工後大幅加薪，加薪後嘅入息又啱啱好夠過壓力測試等等。

有時候按保公司會進行公司查冊，如果發現申請人任職公司係由申請人本人持有或近親持有，按保公司會要求取得該公司嘅核數師報告及公司稅單作參考。若發現其公司營運以及出糧薪金不合理的話，按保公司亦會拒絕其申請。

2. 手持多於一個物業

由於申請按保嘅其中一個條件係物業必需要為自住用途，若然申請人持有多於一個物業，按保公司會質疑為何申請人不取回其他手持嘅物業作自住，而需要另置物業自住。

當然，有部分情況即使申請人原先已手持其他物業，按保公司亦會接受其申請；例如申請人原先持有嘅物業係供父母居住，另置新居亦屬合情合理。

事實上，只要大家行得正企得正，做事合法合情合理，按保公司亦不會刻意留難。

按揭保險並唔係大家想像中咁難批。

建議閱讀：
新舊按保全面睇
申請按揭保險所需注意事項
按揭保險FAQ