讀者來函：綠表持證人年事已高，買居屋做到按揭？

雖然公屋租金相比起私人住宅租金經濟實惠得多，但始終業權不屬於自己，故不少人會選擇係有能力供得起樓時都會將公屋歸還政府，再以綠表資格買入未補地價居屋。雖然居屋係買入之後業權便屬於業主所有，但由於居屋為未補地價，故將物業出售或從物業中套現仍有不少限制。

筆者亦收到不少查詢係關於綠表持證人年事已高，想將現在租住嘅公屋歸還再買入未補地價居屋。其主要原因為配合家庭之財務安排，唔想浪費綠表資格，免得年紀老邁嘅家人在過身後公屋直接歸還政府。

而綠表持證人年紀大且無收入，以綠表買入居屋時按揭又做唔做到？

事實上，申請居屋按揭最重要係睇政府擔保期，政府擔保期為30年且最長按揭年期為25年，而擔保期由首次出售日期開始計算。政府擔保期內，由於有政府作為擔保人，申請按揭無需要提供入息證明及通過壓力測試，但銀行仍然要求申請人申報入息證明其有能力供樓。

如果綠表持證人年紀大及無收入，申請人仍可以申報家庭入息以供證明有能力供樓，而家庭成員並不限於登記之家庭成員。即是話只要有家庭成員為按揭還款孭飛，即使綠表持證人年紀大無收入銀行仍願意批出按揭貸款。

不過要注意，各銀行對於高齡綠表業主嘅審批取態亦有唔同，部分銀行只要申報有家庭成員負責供款即可批25年，部分銀行以「99-申請人年紀」作為最長年按揭年期，亦有銀行不接受高於80歲業主之申請，所以高齡業主買入居屋前應先查清楚邊間銀行可以批出按揭。

另外，如果綠表持證人年紀大，將公屋歸還並買入居屋係基於家庭財務安排嘅考慮，筆者建議客人應該召開家庭會等家庭成員之間得到共識。之後亦應盡快搵律師協助處理「平安紙」，以免日後有誤會令家人之間關係受損。

建議閱讀：
【2020居屋 – 重要資訊+按揭懶人包】(9月2日更新)
政府放寬按保，手持綠表應該買居屋定買私樓？