中原城市領先指數CCL8月創新高188點，其後由高位回調約6%至今約177點。
衝住去買新樓嘅熾熱不在，市場上一眾買家們都情願睇定啲，而唔希望買「當頭跌」。
香港人愛磚頭呢個現象應該無人不知，過往辣招未出現嘅時候，我地經常見到啲朋友加按現有物業作為新購物業嘅首期。
過去有唔少朋友搭上樓市上升嘅順風車，將物業一變二，二變四，最後由「上車」變成「上岸」。
不過自從香港政府推出樓市辣招打壓炒樓風，由減低按揭成數至開徵額外印花稅等等，以上提及嘅方法亦不再適用。
睇見個樓市回調，相信唔少業主都心慌慌。
望住自己住緊層樓嘅估價過去一路係咁升，但一日唔賣層樓，物業估價升幾多都同自己無關，畢竟只係紙上黃金。
係呢個情況，大家不妨考慮一下做個轉按套現，同時間將層樓按到盡。
原因有以下幾個：
舉個例
朋友A係三年前以500萬買入一個物業，剩餘按揭280萬，物業現估價800萬。
假設朋友現將物業盡按，1000萬以下物業最多可造6成按揭，800萬物業最多可借480萬。
呢個情況，朋友A最多可以轉按套現（480萬 – 280萬）＝200萬。
1. 趁樓價在高位進行利潤鎖定
係樓市不明朗嘅情況，相信未來物業估價會向下調，現在趁高價轉按套現將物業升值部分確確實實變成現金。
轉按套現後就唔需要擔心未來樓價下跌，影響物業作為金融嘅功能，因為現金已經袋袋平安。
若然將來突然有資金需要，亦唔需要擔心以後樓價下跌而減少可套現嘅金額。
2. 賺取更多銀行現金回贈
現時各大銀行為搶佔市場份額都會提供高現金回贈，一般回贈約為貸款額之2%。
如果朋友A只將剩餘貸款額280萬進行「平手轉按」可得到現金回贈（280萬 x 2%）＝$56,000
若轉按套現將層樓按到盡，可得到現金回贈（480萬 x 2%）＝$96,000
3. 無需成本獲得更多流動現金
可能你會問「借多咗成200萬，唔使比利息咩！」
現在好多銀行都會為客人提供一個「按揭存款掛鈎」戶口，戶口存款利率等同按揭利率。
而此類戶口可接受最高存款為貸款額之50%或60%，視乎不同銀行而定。
如果朋友A按盡480萬，以50%為例，「按揭存款掛鈎」戶口最多可接受240萬之存款。
朋友A轉按套現200萬，借多咗呢200萬可以全數放入戶口內，對沖按揭利息，變相等於無成本得到額外200萬現金嘅流動性。
即使暫時無現金需求，亦可以考慮將物業按盡，將多借金額放入「按揭存款掛鈎」戶口，以備不時之需。
建議閱讀：
About the Author: 文博
