相信對於香港人黎講，「買樓」應該係一生人入面其中一個好重要嘅決定。而基本上十個人買樓有九個半都會同銀行申請按揭完成物業成交。
好多朋友買嘅第一個物業多數會係600萬以下，務求以有限度嘅首期配合高成數按揭「上車」。
而呢班朋友好多時都係第一次置業，對於能唔能夠成功申請按揭，特別係申請高成數按揭嘅朋友會較擔心。生怕簽咗臨約之後申請按揭先發覺批唔到而要撻訂，令辛辛苦苦儲落嘅積蓄付諸流水。
咁到底有無方法可以防止呢個慘劇發生呢？
事實上，銀行設有預先批核機制，即準買家在簽訂臨約前已經可向銀行申請預批，確保自己能夠成功申請按揭。而有不少朋友誤會，以為預批時只需提供簡單個人資料及口頭申報入息便可，此想法實在大錯特錯！
其實預先批核與正式申請按揭所需提供的文件大部分是一樣的！包括入息證明及身分證明等等。而申請預批時不需要提供臨約，只需提供申請按揭的物業之確實地址便可。
雖然預先批核機制的確為客人提供一個安全的方法，但在實際操作上有不少限制。
1. 所需時間較長
站在銀行角度，處理預批申請嘅優先次序肯定會較普通按揭申請為後。因為相比起一般按揭申請，預批可以係買賣雙方未就交易達成共識就做申請，即是話我行過樓下地產鋪見到有個單位想買，可能十劃都未有一撇都可以申請預批。預批較大機會係煲緊無米粥，所以所需時間會較長。而申請高成數按揭要經過HKMC，約兩個月審批時間多數走唔甩！
2. 批到個時，可能層樓都比人買左
俗語所謂「執輸行頭慘過敗家」，有時見到有荀盤唔好講話要去銀行到做預批，分分鐘一個鐘頭後就已經比人買咗。係香港呢個樓市咁活躍嘅地方，預批係實際操作上往往作用較有限。
雖然預批限制較多，不過在某幾個情況下筆者都會建議客人應該要做預批
1. 曾破產人士
曾經破產之人士在取得破產解除令後是可以向銀行申請按揭，但不少銀行都不願意批出按揭予曾破產人士。有部分銀行願意接受申請，但亦不保證一定會批出。而若然曾經在某銀行走數破產，則很大機會該銀行會拒絕客人的按揭申請。
2. 因某些原因未能提供最近一期稅單
申請高成數按揭時，銀行都需要客人提供稅單，若因種種原因未能提供則有機會影響其申請。除非客人為公務員或在很大型的公司工作，則有機會不用提供稅單都可以批出高成數按揭。
3. 可能有業權問題之物業
如送契物業，遺產物業，樓契為核證重印等等，銀行有時候會拒絕批出按揭。而銀行一般都不願意對五年內之送契及遺產物業批出按揭。
About the Author: 文博
