好多人對於自僱人士申請按揭都有個刻板印象，就係自僱人士按揭「好難批」。所以好多自僱人士都會出糧比自己，將自己由「自僱」變為「受薪」，覺得咁樣按揭會易批啲，而銀行對於「出糧比自己」又會點批法呢？
銀行處理按揭申請時會進行公司查冊，如果查冊發現申請人為該獨資公司持有人，銀行仍然會視為自僱人士申請。所以自己出糧比自己當受薪人士申請按揭係行唔通！而銀行需要獨資經營嘅自僱人士提供2年稅單作為收入證明，而入息將以稅單所顯示嘅2年收入除以24個月作為計算DSR及壓力測試之收入。需要留意，申請按揭保險情況下，自僱人士（非固定收入）最多只能申8成按揭，而9成按揭則必須為固定受薪人士。
坊間對於自僱人士按揭「難批」嘅刻板印象，來自於獨資公司報稅上嘅操作。因為公司想慳稅，所以報稅時會係合法同合理嘅框架下「做數」，令公司淨利潤少什至出現虧損從而減少稅項支出。由於大部分獨資公司經營者申請按揭時，只能向銀行提供「微利」及「虧損」嘅入息證明，而收入未能通過DSR及壓力測試要求，試問銀行又點樣可以批出按揭呢？
順帶一提，固定受薪人士，申請高成數按揭，除提供最近3個月入息證明，亦需提供最近兩年稅單；若申請成數為6成或以下，則只需要提供3個月之入息證明即可。如果申請按揭成數為6成以下，由自僱人士轉變為打工仔，只要能夠提供所需入息證明，銀行一般都會批出按揭。
延伸閱讀：
自僱人士好難申請按揭，係真唔係？
按揭保險FAQ
About the Author: 文博
係呢個資金泛濫嘅年代，如何運用金融知識及善用借貸力為非常重要嘅一環。
熱於研究「按揭財技」，閒時寫寫文分享下所見所聞千奇百趣嘅按揭個案。
