高收入父母做擔保人，按揭未必批得到

香港樓價世界排名中名列前矛，年輕人要上車好多時都需要父母幫助，不論係首期抑或借貸力。不過要注意，如果要借助高收入父母嘅收入買樓，父母嘅年紀對於按揭能否批出起關鍵作用。

高成數按揭

絕大部分人首次置業都會申請按揭保險以高成數按揭「上會」。同一樓價下，按揭成數愈高即所需月入要求就愈高。當年輕人單靠個人入息不足以通過壓力測試，好多時需要家人作為擔保才能滿足月入要求。

好多人以為只要擔保人入息夠高就可以過到關，但事實上只要擔保人年滿60歲，根據過往經驗按保公司將不會計算該收入！所以想以高收入父母/家人作擔保，需留意擔保人年紀是否己年滿60歲！切忌坐定粒六以為一定無問題。

按揭成數6成或以下

如果申請按揭成數為6成或以下，即非高成數按揭。即使擔保人年滿60歲，一般情況下銀行仍然可以計算該收入以通過壓力測試。唯需注意，銀行有機會以擔保人年紀計算最長按揭年期。例如擔保人60歲，而銀行按揭年期以「75減」計算年期，則最長年期為（75-60）＝15年。

如想拉長按揭年期，年長父母可以聯名借款人身份而非擔保人，銀行便可以年紀較輕申請人年紀計算，拉長按揭年期。

申請日期與成交日期

按揭申請一般於成交日3個月前可以開始申請，如果高收入父母作為擔保人申請按揭，父母於申請日期時為59歲，到成交日期時滿60歲。申請高成數按揭時，係有成功批出嘅案例！

不過目前銀行及按保公司批核都趨手緊，所以筆者建議以上方法係目前非常時期都係唔好搏穩陣啲。

延伸閱讀：
擔保人FAQ
年邁父親作為擔保人-父幹的按揭考慮