有得揀，你先係老闆

「香港樓價貴」相信應該無人不知無人不曉。根據國際公共政策顧問機構Demographia發表2018年全球樓價負擔能力報告，香港已經連續第9年成為全港樓價最難負擔的城市，港人要不吃不喝21年才能置業，數字相當驚人。

望住中原城市領先指數由2003年嘅40點，每年節節上升至今日超過180點。樓價未必高處不勝寒，但相信已經令好多年輕人覺得心寒。十幾年前大學生畢業生平均起薪點約$15,000，十多年過去今日大學生畢業起薪同為$15,000；十幾年前，百多萬已經可以係香港有個安樂窩，時至今日，百多萬連俾首期都摱摱緊。

不少年輕人對未來感絕望，甚至乎對未來的人生計劃全無打算。好多淪為「月光族」，餐飲餐食餐餐清，實行今朝有酒今朝醉嘅生活態度。當然，各人有各人嘅生活模式以及生活態度，沒有誰比誰高尚，只要活得快樂對自己負責任即可。

不過有種態度筆者不能認同，就係從來未盡力每件事做好就不斷抱怨。就好似一個從來都無儲蓄習慣嘅人不斷呻樓價好高，上唔到車一樣。沒有充份準備，即使樓價跌個30% 40%，趁低入市嘅機會亦不屬於你。要知道經濟係不斷地循環，機會一定會嚟，但機會嚟嘅時候你又係咪準備好迎接？

1. 關鍵十年

年輕人剛畢業嘅時候，負擔相對較低，理論上儲蓄能力較強。如果想為未來儲定彈藥，呢十年要好好把握！要知道賺第一桶金係最困難，當你賺到第一桶金，你自然就會搵到方法賺到第二桶、第三桶。如果已經過咗關鍵十年都未搵到自己嘅第一桶金都唔使灰心，緊記！羅馬非一日建成，千里之行始於腳下。

2. 可以口袋空空，不能腦袋空空

基本上，大部分有錢人都曾經經歷過「口袋空空」嘅時間，而最終成為窮人或有錢人則取決於腦袋是否空空！即使係兩個起點相同嘅人，係工作上投入程度，工餘時間會否增值自己都會令成就有所不同。而金融知識及財技係現今社會一項頗為重要嘅技能，只要有付出就一定有回報，而市場上亦不乏有關書籍及課程可以參加。「First to learn, then remove the “l”」