首次置業，大家都一定會擔心按揭係咪可以順利獲批，尤其係申請高成數按揭嘅朋友。若按揭拒批又或者批唔足，買家要額外抬多數十萬什至過百萬出嚟，否則就會面臨撻訂。而對於首次置業嘅朋友，最常見嘅問題包括：
問：第一次買樓，有咩費用需要準備？
答：置業所需費用包括：首期、印花稅、律師費、經紀佣金（如經代理買賣）、裝修費（如需）。
問：物業印花稅分邊幾種？我應該交邊種印花稅？
答：物業印花稅分為「從價印花稅AVD」、「額外印花稅SSD」及「買家印花稅BSD」。若買家為香港永久居民並代表自己行事，同時為首次置業則只需繳付「從價印花稅AVD」中的第2標準稅率（適用於住宅物業），稅率根據物業價值由$100至4.25%。
問：我買入層物業最多可以做幾多成按揭？
答：無申請按揭保險嘅情況下，$1000萬以上物業最多可以5成按揭；$1000萬以下物業最多可做6成按揭或$500萬（以或低者為準）。如申請按揭保險，$1920萬或以下物業最多可借960萬。
問：咩係供款與入息比率（DSR）？咩係壓力測試？
答：要成功取得按揭貸款，申請人需要通過供款與入息比率及壓力測試要求。一般情況下需符合以下兩個條件：
(1) 在現行按揭利率計算，每月按揭供款少於月收入的50%。
(2)壓力測試係指在按揭利率加2厘的情況下，每月按揭供款少於月收入的60%
問：按揭年期最長可以做到幾多年？
答：現時按揭最長年期為30年，一般情況下，銀行規定最長年期為（借款人年紀 或 樓齡）＋按揭年期不超過75年，俗稱「75減」。但就著不同物業種類及不同銀行，對於可批出最長按揭年期亦會略有不同。
問：銀行估價低於物業成交價，應該點做？
答：銀行有機會出現估價不足嘅問題，若成交價高於銀行估價，置業嘅首期預算便需要增加，令到客人需要「抬錢上會」完成交易。而不同銀行有機會使用不同嘅估價行，建議簽臨約前多向幾間銀行查詢估價。
問：申請按揭有咩文件需要準備？
答：申請人需要準備嘅文件主要係入息證明，入息證明包括：糧單、出糧戶口記錄、僱傭合約、強積金供款記錄、稅單。
問：凶宅或同層凶宅，按揭做唔做到？
答：如果估價行知道單位係凶宅，便會拒絕對單位進行估價，估唔到價意味一定做唔到按揭。對於同層凶宅，估價行亦有機會唔估價。而即使銀行對單位估到價，亦唔一定做到按揭，因為即使估價行願意對凶宅或同層凶宅估價，銀行亦有機會採取較保守態度而不願批出按揭。客人應事前向銀行查詢以及同時間向多間銀行申請按揭。若銀行不願對同層凶宅批出按揭，大部分情況銀行職員於申請前已經可以告之。
問：買入物業缺失樓契正本，對申請按揭有咩影響？
答：若買入嘅係現契物業，有機會出現缺失樓契正本嘅情況，俗稱「無契樓」。大家需要注意，對於「無契樓」只有部分銀行願意接受申請，同時需要有律師樓願意孭飛，證明該物業屬於「良好業權」，才可以申請銀行按揭。對於買入「無契樓」，風險相對較高，客人需衡量風險。
問：揀銀行嘅時候，有咩需要注意嘅地方？
答：一般情況，客人會以按揭利息高低及現金回贈多少作考慮。而除此以外，銀行審批按揭所需時間，罰息期長短及是否有高息戶口亦為申請人需要考慮嘅因素。
問：搵按揭轉介公司幫手同直接去銀行申請有咩分別？
答：市場上按揭轉介公司林林總總，大部分都具備銀行按揭計劃嘅報價功能，即提供利率及現金回贈等資訊。另外，部分轉介公司會為客人提供額外回贈，即經轉介公司到銀行申請按揭，可享有更多現金回贈！而有部分轉介公司則同時具備「按揭顧問」嘅功能同角色，可協助客人解決按揭疑難，增加按揭獲批成功率。
About the Author: 文博
