剛剛過去的6月份，相信對大家來說都不是一個易過的月份。除了香港社會發生了大事外，按揭市場亦有一顆震撼彈。
隨住匯豐銀行帶頭減少對客人提供的現金回贈，很多銀行都跟隨其腳步減少現金回贈。同時將H Plan的鎖息封頂由（P-2.75%）轉為（P-2.65%），鎖息封頂將由2.375%調整至2.475%，變相加息。
筆者因此收到很多客戶朋友的查詢：「在現時銀行減現金回贈的情況，仲值唔值得做轉按？」。
事實上，所有決定都伴隨著得益和成本，在絕大部分情況下只要得益大過成本就值得做。
1. 得益 >成本？
現在大部分銀行的現金回贈由逾2%下調至1.5%，以平均每宗按揭貸款400萬為例，回贈由$80,000減至$60,000。雖然在帳面上比原先減少咗25%回贈，但轉按仍然絕對值得做！因為在扣去約$6,000的律師費後，都有逾$50,000落袋！
在銀行下調現金回贈時，很多朋友跌入了「2% VS. 1.5%」的陷阱而對轉按有卻步。事實上，無論銀行回贈「1%」「1.5%」「2%」都好，做就有，唔做就無，所以只要有賺就老虎蟹都做！
只有一個情況未必值得做，就係貸款額太低。例如貸款額只有50萬，銀行回贈幾千蚊在扣去律師費後接近打個和，呢個情況或者就多一事不如少一事啦。
2. 人棄我取！仍有銀行以高回贈搶灘
雖然多間銀行接二連三減現金回贈，但仍然有銀行為客人提供多於2%的現金回贈，係呢個減回贈嘅大環境下搶佔市場佔有率。而且，經按揭轉介公司安排更可享有額外嘅現金回贈，實際上影響並不是太大。
3. 鎖息封頂真係上調？
大部分銀行H Plan鎖息上限上調0.1%至2.475%，變相加息。但仍然有銀行維持H Plan鎖息上限不變，亦有銀行在特定貸款額的門檻可以維持鎖息上限不變。另外，銀行按揭貸款除了有H Plan供客人選擇，同時亦有P Plan可以揀，而現時好多銀行嘅P Plan鎖息上限仍然維持係2.375%。現時拆息長期維持高位，相信新造按揭選用P Plan嘅比例亦會增加。
總結而言，有食唔食罪大惡極！計過有「So」，必定去做！而如果本身因為減回贈而唔做轉按嘅朋友，係睇完筆者嘅分享而決定做轉按賺回贈，筆者都好歡迎大家請我飲茶。
About the Author: 文博
