「消費分期」與「帳單分期」大不同

信用卡嘅出現令到我哋嘅生活更方便，同時間亦鼓勵大家消費推動經濟。

我哋經常拎住張信用卡碌碌碌，到底會唔會影響買樓時候嘅借貸力？

成日聽到「消費分期」同「帳單分期」，兩者到底又有咩分別？邊種會影響按揭貸款；邊種又唔影響呢？

消費分期

商戶為咗催谷我哋消費，有時候會為客人提供信用卡免息分期，鼓勵大家買咗件產品返去用再慢慢供。而呢一項直接由商戶提供嘅信用卡分期，叫做「消費分期」。係申請按揭貸款時，銀行一般都可以豁免「消費分期」嘅每月供款，唔將呢筆供款計落供款與入息比率當中。

帳單分期

「帳單分期」係客人向銀行申請，將一期帳單分為多期還款，還款期一般最長為60個月。與「消費分期」不同，銀行會向「帳單分期」額外向客人每月收取手續費。而「帳單分期」嘅每月還款一般係需要計算入供款與入息比率當中！

曾經有個朋友申請按揭時，分唔清「消費分期」同「帳單分期」，誤以為全部每月還款都可以豁免唔計入供款與入息比率。結果計唔掂數，要自己抬錢還清所有「帳單分期」，銀行先可以批出按揭貸款。

日常信用卡簽帳

一般日常消費簽帳都唔影響批出按揭，不過銀行會要客人提供信用卡月結單，睇下客人平時係咪每期都準時還款及還款係咪只係還Min Pay。如果申請按揭時，銀行見到客人有好大筆信用卡簽帳未還，銀行可能會要求客人清還再提供settlement proof 先可以批出按揭。

建議閱讀：
信用卡簽賬，信用卡貸款（現金分期），消費分期會影響供款與入息比率？ 
信用卡太多會影響按揭？
想轉按套現套到盡，無奈私人貸款影響「DSR」可以點做？