讀者來函：幫未婚妻做咗按揭擔保人，而家分開咗可以點甩擔保？

「問世間情為何物，直教我擔保你買樓」

係香港地好多人首次置業嘅時候由於份糧唔夠過壓力測試，需要搵屋企人做擔保，甚至乎搵男女朋友、未婚夫、未婚妻做擔保。幫人借錢做擔保其實就等於將成條數孭咗上身，若然借款人無能力還款時擔保人有責任幫手償還。如果擔保人日後有置業打算，其借貸能力亦有影響。

鑑於日前施政報告放寬按保，有唔少人開始部署拆名甩名去買樓。而筆者最近亦收到唔少查詢係關於「之前幫男女朋友及未婚夫妻做咗擔保，而家分開咗，點先可以甩返個擔保人身份？」

事實上，作為擔保人係處於一個絕對被動嘅位置！因為擔保人並唔能夠單方面去申請甩擔保，而只有係以下呢幾種情況先可以甩擔保人嘅身份甩返出嚟。

1. 業主賣樓

當業主賣出物業嘅時候，由於原按揭銀行會收回所有未償還按揭貸款，所以業主及擔保人亦無再欠銀行按揭貸款。

2. 業主轉按

轉按時，由於整個按揭貸款需要重做，如果單靠業主個人嘅入息已經足夠過到壓力測試就最簡單直接。而若然業主一個人嘅收入唔夠計數，轉按時亦可以用其他屋企人做擔保。

以上情況係假設業主願意配合甩擔保人。而筆者遇過最惡劣嘅情況係業主唔肯做任何動作，擔保人亦無可奈何。所以幫人做擔保前要三思，萬一真係咁不幸同另一半分開亦要及早處理，否則可能後患無窮！

建議閱讀：
做咗擔保人，買樓仲可唔可以申請按揭保險？ 
做擔保人幫屋企人買樓有什麼風險？ 
按揭人、借款人與擔保人點分？
擔保人FAQ