疫情下，樓市雖未見大幅度下跌，但仍有零星個案業主劈價出貨。不少潛在購買力在過去一直在等待入市嘅機會，所以唔少人打算可以食正個勢搵到荀盤入市。而係呢個時間入市，申講按揭亦要做多少少功夫。
估價與成交價
呢段時間，估價行對於物業估價普遍都變得保守，以致有時業主開價高於銀行估價。若最終估價不足，買家便需要額外抬錢去完成成交。事實上，向銀行查詢估價時，有個小技巧可以更準確知道銀行估唔估得足。
按揭分為「成交個案」及「轉按個案」，而「成交個案」一般估價行都願意估高少少配合成交。而銀行第一口估價通常未估到盡，所以大家向銀行查詢物業估價時可以問清楚銀行，「有臨約」嘅情況最高可以估到幾多，以及到唔到價。一般只要銀行到價，按保公司都會以銀行估價處理申請。
選擇按揭銀行
疫情持續影響本港經濟，開始有部分銀行「落雨收遮」，什至針對部分行業拒批申請，又或者對於非固定收入採取打折計算入息。不過大家唔需要太擔心，因為現時只有少部分銀行出現上述情況，主要為中小型銀行。
所以大家打算入市的話，應及早向銀行或按揭公司查詢自身行業有無受到影響，以及邊間銀行批出按揭機會最大。而大家亦不宜沽注一擲，應同時向幾間銀行申請以策萬全。
預留適當現金
好多朋友於置業時基本上傾盡身家，於成交後口袋空空，瞓身入市十分常見。雖此理財方式未見理想，於旺市時風險屬可控。但以目前市況而言，大家應預留足夠應付一年供樓之現金較為理想。因為疫情幾時完結無人知，經濟最壞情況係點亦都無人知！萬一受疫情及經濟下行影響而令到大家失業供唔起樓，無預留現金應付供樓就非常危險！
不時都聽到「如果自己首期預算較充裕，按揭可以借少啲就借少啲」，我係唔認同嘅！特別係現時情況，可以借到幾多就借幾多，有錢多嘅可以放落Mortgage-Link以對沖按揭利息。當有呢筆流動資金係手，可以話係幫自己買個保險，即使失業亦可以用Mortgage-Link預留嘅資金暫時應付供樓開支，以免斷供比銀行收樓。
About the Author: 文博
