今年五月政府推出「定息按揭試驗計劃」，總貸款額為$10億。原定申請日期截止為2020年10月31日，現延長一年至2021年10月30日，同時間亦將定息按揭計劃之利率下調。是次計劃延長申請及減息，背後反映緊啲咩？
市場預期低息環境仍會持續
定息按揭試驗計劃貸款總額為$10億並且額滿即止，延長申請時間一年，相信乃由於額度未被充分利用所致。同時間，為增加計劃吸引力，10年、15年及20年定息按揭利率由原定2.75%、2.85%及2.95%，減至1.99%、2.09%及2.19%。
不過，由於香港銀行體系內的資金滿瀉令拆息維持低水平，近日更出現歷史新低，相信未來拆息低企仍然為市場共識。以目前新造一般按揭計劃，實際按息維持於2釐以下，而定息按揭計劃利率為1.99%至2.19%。只要預期低息環境持續，定息按揭計劃對用家而言並沒有太大吸引力。
而且，與一般按揭計劃不同，銀行並沒有為定息按揭計劃提供現金回贈及高息戶口，進一步減低計劃吸引力。
用家實力較預期強
定息按揭計劃其中一個賣點為申請人毋需通過壓力測試要求，只需通過供款與入息比率即可。上年放寬按揭保險樓價上限，為不少缺乏首期但高收入人士開通「上車」大門。受惠於政策放寬，該批高收入人士大多都能順利通過壓力測試，考慮到一般按揭計劃條款較定息按揭計劃優惠，對於能順利通過壓力測試嘅用家而言，選擇一般按揭計劃亦屬合理。而筆者觀察所得，於疫情期間好咗好多公務員及教師等「鐵飯碗」職業嘅用家決定入市，反映現時入市用家實力較強。
About the Author: 文博
係呢個資金泛濫嘅年代，如何運用金融知識及善用借貸力為非常重要嘅一環。
熱於研究「按揭財技」，閒時寫寫文分享下所見所聞千奇百趣嘅按揭個案。
