首次置業，有咩要準備？

相信大部分香港人心中都有一個置業夢，希望擁有屬於自己嘅一個安樂蝸。

而首次置業嘅朋友，到底有咩準備工夫要做呢？

1. 計數計數計數！

大部香港人買樓都會用到銀行嘅按揭貸款，甚少會「Full Paid」買樓。而向銀行申請按揭，需符合供款與入息比率規定及通過壓力測試，若未能通過銀行則不會批出按揭。另外，要緊記所有債務亦需計算在內，包括私人貸款，信用卡現金分期，汽車貸款等等。

2. 執齊文件免甩漏

申請銀行按揭需要提供糧單、出糧記錄、銀行戶口記錄等。

若申請高成數按揭涉及按揭保險，需提供以上文件外，另外要提供稅單，銀行亦有機會要求客人提供強積金供款記錄。

大家平時可能都會將啲野四圍放，若有計劃置業嘅朋友記得盡早準備定所需文件，免得到申請時出問題。

3. 銀行估價 VS 成交價

要知道銀行有機會出現估價不足嘅問題，若成交價高於銀行估價，置業嘅首期預算便會提高，令到客人需要「抬錢上會」完成交易。

為避免以上情況，計劃置業嘅朋友記得係簽訂臨約前向銀行查詢物業地址嘅估價，確保估價到位，免得出現「抬錢上會」及撻訂嘅情況。

4. 樓齡 / 人齡 會影響最長可承造按揭年期

目前銀行願意為物業提供最長30年嘅按揭還款年期，另外規定樓齡/人齡加還款年期不超過一個特定年期，例如70年、75年等。

由於按揭還款年期會影響供款與入息比率及壓力測試，所以申請前記得問清楚該銀行最長可以承造嘅按揭年期。

建議閱讀：
首次置業FAQ
談「按揭顧問」之重要性
買樓客應如何選擇現金回贈？ 
選擇銀行時，「按息」與「回贈」以外的考慮因素 
買左樓選擇按揭銀行的3個大原則