學生貸款（Grant Loan）要計入DSR及壓測嗎？

只要係香港本地升學，大部分大專院校課程都可以申請政府資助或者學生貸款。學生貸款利息亦相低，而貸款於畢業後先開始還款，所以唔少學生都會申請學貸以繼續升學。咁孭住筆學貸又會唔會影響買樓？每月還款又使唔使計入供款與入息比率同壓力測試？就等筆者同大家分享一下。

銀行收到客人按揭申請時會向環聯（TU）查詢客人之信貸報告作審批之用，而信貸報告中會顯示客人於銀行及財務機構開立嘅戶口、信用卡及貸款等等。而所有係TU顯示嘅債務及每月還款，銀行會用來計算客人供款與入息比率及壓力測試。

學貸與私人貸款不同，學貸並不會於信貸報告中顯示，所以一般情況下銀行並不知道申請人是否有學貸係身。當銀行係不知情嘅情況，不會自動將學貸還款計算入每月供款當中。不過要注意，客人有責任主動向銀行申報其財務狀況。

同時，銀行有機會從其他渠道得知客人有學貸係身，例如客人每個月從戶口自動轉帳償還學貸。當銀行見到客人月結單有恒常付款指示，亦有機會要求客人解釋該筆款項嘅用途及提供證明文件。如果申請人又無做自動轉帳，申請時交嘅銀行月結單又見唔到呢筆數，銀行就好難知道申請人有學貸係身。

最後筆者提提大家，客人係有責任如實向銀行申報其財務狀況，如作出虛假聲明有機會影響銀行批出按揭。

建議閱讀：
有咩債務會出現係信貸報告？對申請按揭有咩影響？
信用卡簽賬，信用卡貸款（現金分期），消費分期會影響供款與入息比率？
想轉按套現套到盡，無奈私人貸款影響「DSR」可以點做？
壓力測試之實際應用