現時按揭年期最長為30年，而銀行批出最長按揭年期準則一般為「75年 – 樓齡」。若樓齡為50年，按上述標準則最長只能做25年按揭。香港不少藍籌屋苑即使樓齡達半百仍不乏買家，當我哋要買入樓齡較大嘅藍籌屋苑，有咩地方需要注意？
非高成數按揭（不用按揭保險）
沒有申請按揭保險嘅情況，$1000萬以下物業最多可借6成按揭及最高貸款額為$500萬；$1000萬以上物業則最多可借5成按揭。由於非高成數按揭，按揭審批只需由銀行批核而不經按保公司，對於所批出嘅按揭年期彈性較大。
部分銀行有屬於自己內部使用嘅一張藍籌屋苑清單，清單內嘅屋苑最長按揭年期可做「80年 – 樓齡」，亦有銀行會選擇增加按揭利率，可批出「85年 – 樓齡」作為最長按揭年期。
高成數按揭（需要按揭保險）
申請按揭保險嘅情況，$1000萬以下物業最高可借8至9成按揭，申請人須向按揭保險公司申請及繳付按揭保費。由於高成數按揭須同時滿足銀行及按保公司的審批要求，所以即使買入物業屬於藍籌屋苑，銀行願意批出30年按揭，但按保公司則只批出25年，按揭年期就只能做25年。
根據筆者觀察所得，HKMC對於按揭年期上基本上以「75年 – 樓齡」為最長按揭年期，而QBE較HKMC寬鬆少許，筆者亦曾協助客人批出「80年 – 樓齡」作為最長按揭年期，但實屬可遇不可求。
物業再出售之考慮
買入樓齡半百嘅藍籌屋苑，亦要考慮將物業出售時會遇到嘅問題。由於按揭年期長短會直接影響通過壓力測試月入要求，按揭年期愈短，壓力測試月入要就愈高。若然日後銀行及按保公司對於樓齡規定沒有更改或放寬，隨着樓齡愈大，最長可做按揭年期愈短，業主放售物業難度亦會大大增加。
About the Author: 文博
係呢個資金泛濫嘅年代，如何運用金融知識及善用借貸力為非常重要嘅一環。
熱於研究「按揭財技」，閒時寫寫文分享下所見所聞千奇百趣嘅按揭個案。
