根據世邦魏理仕最新《全球生活報告》顯示，香港住宅物業平均樓價繼續貴絕全球。香港已經連續五年稱冠，寸金尺土實屬當之無愧！
係香港要成功置業，除咗要儲夠首期，仲要確保自己過到壓力測試先可以順利晉身成為業主。壓力測試指按現行利率加3%嘅情況下，供款不超過入息之60%便可。
若然入息唔夠計，最簡單嘅解決方法就係加擔保人。咁到底擔保人人數有無限制？而擔保人係咪愈多愈好？
擔保人人數限制
由於幫人做擔保係等於將條數孭上身，所以筆者處理眾多加擔保人個案絕大部分擔保人人數都係一個起兩個止。而實際上各銀行對於擔保人人數亦有不同限制，有銀行不設限、有銀行申請表上最多可以有5個人名、有的接受2至3位擔保人等等。如果有需要加幾個擔保人的話，請預先詢問銀行有無特別限制。
另外需要注意。現時大部分按揭申請均會以「All Monies」形式處理，即擔保人除擔保申請人嘅按揭貸款外，同時間亦擔保埋申請人係該銀行嘅其他貸款，即是話申請人無力償還該銀行嘅任何貸款，擔保人都有責任幫申請人還錢！
擔保人愈多愈好？
理論上，擔保人愈多總收入就會愈高，應該愈容易通過壓力測試，但實際上有時會有反效果。由於壓力測試係按目前利率加3%，「所有債務」之供款不能超過入息60%，好多時候大家分唔清楚邊類供款需要計算在內，曾經有客人誤以為「信用卡現金分期」及「信用卡帳單分期」不用計算在內，令到加擔保人反而出現反效果，所以選擇擔保人最好揀啲無外債記錄就較為理想！
建議閱讀：
按揭擔保人有無限制？三唔識七都可以做擔保？
高收入父母做擔保人，按揭未必批得到
做咗擔保人，買樓仲可唔可以申請按揭保險？
做擔保人幫屋企人買樓有什麼風險？
擔保人FAQ
About the Author: 文博
係呢個資金泛濫嘅年代，如何運用金融知識及善用借貸力為非常重要嘅一環。
熱於研究「按揭財技」，閒時寫寫文分享下所見所聞千奇百趣嘅按揭個案。
